Timang Jalung Benedict Sandin 😊
- Bup: Gawai Antu
Kedut Cherita Ari Timang Jalung Dalam Bup Gawai Antu-Benedict Sandin
Lemambang berengkah nimang
jalung di bilik lalu pansut ke ruai. Sida bisi minching jalung ke udah diisi
enggau ai tuak ti ditudung rat enggau kain. Sepengudah bala lemambang nyebut
asal penatai ai jalung, dia bala sebayan begau. Ini Inan seduai Endu Dara
Rambai Geruda lalu nesau, ngangau enggau bebaika orang sebayan ba sebelah
pating aur, sebelah tiang temuda nurun ngabang taja pan ujan labuh nelian. Bala
sebayan lalu nurun ngabang ari wong beranggung tujuh ringkat alai semengat
mensia mati. Keterubah, sida datai ba
menua Indai Billai tauka digela Endu Dara Belenyok. Be menua tu bisi lempa
tanah lada lalu mayuh bala jelu dipeda baka kenyalang enggau bala pama. Udah
nya, datai ba menua Manang Nyara tauka digela Manang Linsing ba tatai panjai
endur bala manang enggau orang belian nangkap semengat. Sida iya udah nya datai
ba menua indu mati beranak ti bisi kelai tibak enggau bingka lia purang.
Lalu rembus mih sida ba
menua orang mati pandak umur ba tebiang endur tumbuh madang nibung ti nadai
upa. Datai gak sida ba menua orang mati makai tubai. Menua tu diuan bala orang
ke kempang muai nyawa. Udah nya, sida lalu datai ba menua orang mati labuh ti
bekelaika rupuh tali. Terengkah mih sida ba menua orang mati tesat. Menua nya
menua kampung. Menua nya mih endur bala mensia udah tesat lelak lembut tulang
enggau udah pedis rang bai bekangau. Rembus mih sida ba menua orang ti parai
lemas. Kejang ari nya, sida manggai ba tuchung peninggal ma ti puang enggau
datai di lebak ke bisi kapar batang. Nya mih menua orang mati pangka peti
enggau mati ngayau. Datai ba menua siti tu, dia mih bisi tepedaka mayuh darah
nuntung di urat dandi ti liat. Menua nya mih dikumbai menua orang mati telih
dipangkang bujang kempang ti berani muai nyawa sereta enda ngasi jaku tagang.
Terengkah ba emperan
nyapan, dia mih menua anak mit mati lulus tauka dipangkang sida seranta nadai
apai indai. Lelu rembus sida manggai ba menua ti mayuh embun ke besebun labuh
begupung. Menua tu mih menua dipangkang Ensing Jara anda penyabung ke bauh bulu
penyara manuk sabung. Sepengudah rembus ba 12 iti menua, datai mih bala sebayan
meda pintu tanah ti tebal baka singkap kayu tebelian. Bala
sebayan lalu begempuru berandau laban berundingka
chara deka muka pintu tanah nya dikena ngagai Batang Paku Lelenggi endur bala
lemambang betimang. Ini Tunggang-Tunggi enggau Ini Manang Matai enda puas ati
lalu madahka enti nemu pekara baka tu nyadi enda iya ninggalka pengawa iya
ngaga lanji enggau pemansai. Endu Dara Rambai Geruda ti nyadi ketuai lalu
bejaku. Iya meransang bala orang ke lelaki muka pintu tanah lalu sida
lelaki besaup muka pintu tanah tang enda ulih dibuka.
Bunsu belut tauka digela Endu Sudan tauka Endu
Dara Jawai Burai Lungan ti nguan pintu tanah nganu sida madahka pintu tanah enda
tau dibuka ngapa endur ngujika pemerani. Iya lalu nyubak pintu tanah ti
bekunchi enggau bulu landak bekangkang gadung. Lalu tebuka mih pintu nya sawang lalu
pemesai iya disemaka enggau alai orang tama berimbai dua. Peda ayan mata
panas lalu sida berasai sinu ngenang pengidup sida maya idup suba. Bekejang ari
nya, sida manggai ba menua Menggalai tauka digela Bujang Mit iya nya ulun Indai
Bilai ti nyadi pekirum pesan.
Mansa mih sida ba menua
burung belangking endur puting titi rawan. Burung belangking
bemunyi sering-sering ngerara bala sebayan nengah titi rawan lalu sida
terengkah ba menua bubut ke nyadi pengibun pemansut jalai pangkalan. Datai ba
tanah temuda, sida ngetu enda lama lalu bayam bungai kapu ti udah tumbuh besai
laban bisi dijaga Manang Lansu. Udah nya, datai sida ba tembawai. Sinu mih ati
sida meda tembawai madang rian, madang nangka udah bebuah mesai pala enggau
bedaun pisit perugan. Datai sida iya ba pendai alai begagai selalu mandi
besepuh maya agi idup suba. Datai mih sebayan ba madang ranyai lalu sida duduk
begumpuru meda pemanah madang ranyai nya bedan lebat sereta chundung ti ditanam
Niram seduai Raja Kedawa.
Bala sebayan ke berani
lalu dipinta nupas dan ranyai lalu nyelai ranyai. Orang ari menua orang
bedengah bekenaka ngepan gagong, megai sangkuh enggau ngenggam pala denggah.
Sida nyelai ranyai lalu chapuh mih bala sebayan nyambut enggau gaga ati. Udah
nya, sida betuaika Ini Inan niki ke rumah orang ke begawai. Lemambang nesau
bala sebayan ngaga ensumbar ai tuak. Ai jalung nya lalu diirup orang ke berani
sereta kering semengat. Udah ai jalung diirup, bala sebayan gaga ati lalu
mulaika diri ngagai dunya sebayan nengah leka lemambang ti ngiring sida pulai.
Penguan Kosmos dalam Leka Timang Jalung Gawai Antu-Benedict Sandin
Tiap-tiap menua tadi
endang bisi orang ke nguan menua nya. Nitihka penemu Dr Chemaline Usop (2010),
litaricha invokasyen ulih dikena mansik asal penatai, proses enggau struktur
rampa dunya nitihka pengarap Iban. Enggau nya, timang jalung tu ulih dikena
kitai meda perampa orang ti diau di dunya sebayan ba siti-siti bengkah menua. Ari
konteks penguan kosmos, dunya sebayan tu diuan semengat orang ke udah parai.
Dalam leka timang tu, bisi
madahka dunya sebayan tu ngembuan mayuh menua orang ke udah parai baka menua
orang ke parai beranak, orang mati lemas enggau orang mati pandak umur. Menua
sebayan tu bisi ngembuan ketuai sebaka enggau menua mensia pen bisi ngembuan
ketuai. Nyadi, ketuai ba menua sebayan iya nya Endu Dara Rambai Geruda begulai
enggau Ini Inan ti nyadi ketuai sebayan ke ngulu sida nurun ngabang nitihka
leka timang jalung nya.
Pia mega, menua tu bisi
ngembuan orang ke nemu belian enggau nangkap semengat. Munyi ti udah dipadahka
dalam leka timang, orang ke nemu nangkap semengat enggau belian tu iya nya
Manang Nyara tauka digela Manang Linsing. Penguan kosmos tu mega ngembuan
fizikal ti nyelai baka chunto pendiau Indai Billai tauka digela Endu Dara
Belenyok ke ngembuan buk gelung geletang enggau tusu lanjut sampaika ulih
dilempai ke bau. Penyelai tu mega ulih dipeda ba anda penyabung ke benama Ensing
Jara antu ke bauh bulu penyara selanggai manuk sabung.
Kepenudi iya, dunya
sebayan tu ngembuan daya idup ti sebaka enggau dunya kitai mensia. Pekara tu
bisi diperetika lebuh maya sida sebayan betugung nuntung ba pintu tanah. Dia
Ini Tunggang-Tunggi bisi besebutka ngatur bila lanji enggau Ini Manang Matai
enggai ninggalka langgur bila pemansai. Dalam pekara tu, kitai nemu sida
sebayan mega bisi ngereja pengawa sosial di rumah panjai baka kitai mensia.
*****
